శోకవనం లో సీత

అశోక వనంలో శింశుపా వృక్ష ఛాయలో కూర్చున్న సీతాదేవిని పరివార సహితంగా,అట్టహాసంగా,సర్వాలంకారాలతో  రావణుడు వచ్చినపుడు అ తల్లి ఎలా ఉందో ఎలా వర్ణించారో చూడండి.

కేతుగ్రహగ్రస్త రోహిణి లా కాంతి విహీనంగా-

నిరంతరం రామునే ధ్యానించు శోక పరాయణ లా-

ముందుకు సాగలేక , ఉన్నచోటనే మెదలుచు

ఉన్న నాగవధువు లా-

సదాచార కులంలో పుట్టి పునఃసంస్కార యోగ్యమైన దుష్కులమందు అవతరించిన మగువ లా-

అసత్యమైన అపవాదముతో జారిన కీర్తి లా-

వేద సంబందము లేక శైథిల్యమొందిన బాహ్యవిద్య లా-

క్షీణించిన మహా కీర్తి లా-

అవమానింపబడిన శ్రద్ధ లా-

పరిక్షీణమైన పూజ లా-

నిష్ఫలమైన ఆశ లా-

ధ్వస్తమైన ధనలాభం లా-

పాలింపబడని ఆజ్ఞలా-

అపహృత ద్రవ్య అయిన పూజ లా-

త్రెంచిపారవైచిన పద్మిని లా-

శూరులు మరణించిన సేనలా-

చిక్కని చీకటి క్రమ్మిన కాంతి లా-

నీరులేని నది లా-

అనర్హులచే స్పృశింపబడిన యజ్ఞవేది లా-

అరిన అగ్ని జ్వాల లా

చంద్రునికి గ్రహణము పట్టిన పూర్ణిమ లా-

కరికరముచే అకృష్టమై రేకలు ఊడిన తామరపువ్వులతో కూడిన నీటి ప్రవాహము లేని ఎండిపోయిన నది లా-

నవరత్నఖచిత గృహాలలో నివసింప దగిన సుకుమారి,యూధపతికి దూరమై,స్తంభము నకు బంధించబడ్డ గజరాజ వధువు లా-

ఏకవేణి గా శోకాకార సీత ను కన్నులకు కట్టినట్లు దృశ్య చిత్రీకరణ గావించాడు  వాల్మీకి మహాకవి.